«Қасри миллат» - қасри нав дар маркази Душанбе.
Асосӣ / Хабарҳо
Бахшҳои сайт
Ҷустуҷӯ дар сайт
Хабарҳо
9 August 2016

8 августи соли 2016 дар Мақомоти иҷроияи маҳаллии ҳокмияти давлатӣ дар шаҳри Душанбе таҳти раёсати Маҳмадсаид Убайдуллоев ҷаласаи васеи кории шаҳрдорӣ бо иштироки раисони ноҳияҳои шаҳр, роҳбарони мақомоти ҳифзи ҳуқуқ ва дигар сорхторҳои марбутаи шаҳрӣ оид ба баррасии масоили мубрами хоҷагидории шаҳр  баргузор гардид.

Қабл аз ҳама, Маҳмадсаид Убайдуллоев  таваҷҷуҳи масъулини шаҳрдориро ҷиҳати бомаром ва таври оммавӣ вусъатбахшии татбиқи Қарори Раиси шаҳри Душанбе №131 аз 19 апрели соли 2016 «Дар бораи омодагии ҳамаҷониба ба таҷлили сазовору пуршукӯҳи ҷашни 25-солагии Истиқлолияти давлатии Ҷумҳурии Тоҷикистон дар шаҳри Душанбе» ва тавсеаи тадбирҳо дар доираи 130 рӯзи ободонӣ  нигаронида, илова бар он, оид ба мақсаднок амалисозии сенарияи Намоиши ҷашнӣ бахшида ба таҷлили 25-солагии Истиқлолияти давлатии Ҷумҳурии Тоҷикистон дар Корхонаи воҳиди давлатии «Варзишгоҳи марказии ҷумҳуриявӣ» таҳти унвони «Шукӯҳи Истиқлол» вазифаву масъулияти ҳар як сохтору мақомоти марбутаи шаҳриро мушаххас намуда, ҷиҳати инъикоси мустақими чорабинии мазкур тавассути мониторҳо дар тамоми боғҳои фарҳангию фароғатии шаҳр супориш дод.

Гузашта аз ин, дастур гардид, ки сифати корҳои сохтмонӣ дар иншооти мухталифи таъиноти истеҳсолӣ, хизматрасонӣ, иҷтимоӣ ва фарҳангидошта, ки дар асоси қарорҳои марбутаи Раиси шаҳр имрӯзҳо аз ҳисоби маблағҳои буҷетӣ ва хусусӣ дар доираи татбиқи Нақшаи генералӣ баҳри таъсиси ҷойҳои нави корӣ бо вусъат идома доранд, бобати дар муҳлатҳои муқарраршуда ҳамчун армуғони ҷашнӣ ба истифода додан зери назорати сохторҳои зидахл қарор дода шавад. Ҷои таъкид аст, ки ба ифтихори истиқболи сазовору пуршукӯҳи 25-умин солгарди Истиқлолияти давлатӣ дар партави сиёсати бунёдкоронаи Пешвои миллат, бо ибтикори шаҳрдорӣ аз ҳисоби ҳамаи сарчашмаҳо то охири сол ба маблағи беш аз 2,3 миллиард сомонӣ фондҳои асосӣ ба истифода дода хоҳанд шуд, ки дар таҷрибаи Мақомоти иҷроияи маҳаллии ҳокимияти давлатӣ дар шаҳри Душанбе ҳамчун самараи истиқлолият бесобиқа мебошад.

Инчунин, дар ҷаласа Маҳмадсаид Убайдуллоев зимни ба фаъолони пойтахт муаррифии кадрҳои 28 июли соли 2016 бо қарорҳои дахлдори Раиси шаҳри Душанбе ба вазифаҳои масъул таъиншуда, аз ҷумла Саймаҳмуд Муминов - директори КВД «Бозори Шоҳмансур», Зиёвуддин Наҷмиддинов - директори КВД «Бозори Деҳқон», Нурулло Алиев - сардори Муассисаи давлатии «Раёсати обёрӣ»-Мақомоти иҷроияи маҳаллии ҳокимияти давлатӣ дар шаҳри Душанбе, Маҳмадалӣ Шарипов – директори Муассисаи давлатии «Боғи ҳайвоноти шаҳри Душанбе» ба  Хуршед Кабиров – мудири Шуъбаи нақлиёт, нигоҳдории роҳ ва коммуникатсияи дастгоҳи Раиси шаҳри Душанбе дастур фармуд, ки бо ташкили насби сартосарии тамоми воситаҳои нақлиёти мусофиркашонӣ бо овезаҳои раҳнамоикунандаи мусофирон оид ба самти ҳаракат, масофаи хатсайр, маблағи ҳаққи роҳкиро ва телефонҳои боварӣ барои тамос, баҳри ба низом даровардани хизматрасонии нақлиёти ҷамъиятӣ, тарзи меъёрию дилхоҳ танзим намудани ҳаракати воситаҳои нақлиёт дар хатсайрҳо, аз байн бурдани  танбашавии воситаҳои нақлиёт, ки дар маҷмуъ тавониста бошад ҳимояи ҳуқуқи мусофирон ва дигар иштирокчиёни ҳаракат дар роҳҳоро таъмин созад, тадбирҳои муассир андешад.

Ҳамзамон, мавсуф вазифадор карда шуд, ки дар муддати як моҳ дар якҷоягӣ бо мудири Шуъбаи маъмурию ҳуқуқии дастгоҳи Раиси шаҳри Душанбе Саъдулло Қаюмзода дар доираи муқаррароти санадҳои меъёрии ҳуқуқӣ масъалаи роҳандозии монетизатсияи хизматрасонии воситаҳои нақлиёти мусофиркашонии ҷамъиятиро баррасӣ намуда, ҷиҳати амалисозии минбаъдаи он пешниҳоди асосҳои ҳуқуқидоштаро манзур намоянд.

Дар ҷаласа, инчунин масъалаҳои ҷамъоварии андоз ва иҷрои нақшаҳои буҷетӣ, баланд бардоштани масъулияти нозирони минтақавӣ оид ба аз байн бурдани савдои кӯчагӣ, риояи регламенти шаҳр ва реҷаи корӣ дар субъектҳои савдову хизматрасонӣ, пешгирии амалҳои коррупсионӣ, беҳбуд бахшидани ҳолати санитарию эпидемиологӣ ва зидди сӯхторӣ, вобаста ба афзудани ошённокии иншооти навбунёд дар пойтахт таъмин кардани Раёсати хадамоти давлатии оташнишонии шаҳр бо техникаи зарурӣ, дар таносуби чор ноҳияҳои шаҳр ташкил намудани базаҳои мустақили моддию техникии нақлиёти ёрии таъҷилӣ, ғановати бозори истеъмолӣ ва фаъолияти таъинотии бозорҳои коммуналӣ, баланд бардоштани ифтихори ватанпарастию шаҳрдӯстӣ, донишу маърифати ҳуқуқии сокинон дар роҳи истодагарӣ алайҳи фарҳангу афкори номатлуби бегона ва риояи қоидаҳои шаҳрнишинӣ, истифодаи мақсадноку роҳ надодан ба амалҳои ғасби худсаронаи замин  ва муҳимтар аз ҳама, андешидани тадбирҳои муассир оид ба баррасии саривақтии муроҷиатҳои шахсони воқеию ҳуқуқӣ  дар сохторҳои шаҳрию ноҳиявӣ  мавриди баррасӣ  карор гирифтанд.