Амфитеатр дар шаҳри Душанбе
Асосӣ / Хабарҳо
Бахшҳои сайт
Ҷустуҷӯ дар сайт
Хабарҳо
7 April 2017

  Душанбе, 07.04.2017.   Имрӯз дар асоси дастуру супоришҳои Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Раиси шаҳри Душанбе Рустами Эмомалӣ   ба бунёд ва ифтитоҳи як силсила иншооти нав заминагузорӣ кард.  

Нахуст Раиси шаҳр дар мактаби таҳсилоти умумии № 18 -и ноҳияи Фирдавсии шаҳри Душанбе ба сохтмони бинои иловагии таълимӣ барои 320 ҷойи нишаст санги асос гузошт. Лозим ба зикр аст, ки Муассисаи таҳсилоти миёнаи умумии № 18 соли 1954 таъсис ёфта, бинои он ҳанӯз соли 1947 бунёд гардидааст. Айни ҳол мактаб дорои 780 ҷойи нишаст буда, дар он дар ду баст 1603 нафар хонанда таҳсил мекунад.

Маблағи пешбинишудаа барои иншооти иловагӣ 8 миллиону 400 ҳазор сомонӣ буда, фармоишгари он Вазорати маориф ва илми Ҷумҳурии Тоҷикистон маҳсуб  меёбад. Корҳои сохтмонӣ аз ҷониби Ҷамъияти Дорои Масъулияти Маҳдуди "Ҳамсафар"-и шаҳри Душанбе анҷом дода шуда, тарҳи онро мутахассисони Ҷамъияти Дорои Масъулияти Маҳдуди  "Абрис" омода намудаанд.

Дар ҷараёни суҳбат бо лоиҳакашону бинокорон Рустами Эмомалӣ барои анҷоми босифати корҳои сохтмони маслиҳату дастурҳои муфид доданд.

Имрӯз ҳамчунин ба бунёди бинои Муассисаи таълимии миёнаи №99-и  ноҳияи Синои пойтахт барои 480 ҷойи нишаст замина гузошта шуд. Муассисаи таҳсилоти ибтидоии № 99 дар кӯчаи  Борбад воқеъ буда, дорои 230 ҷойи нишаст мебошад ва айни ҳол шумораи хонандагонаш 400 нафарро дар бар мегирад. Дар ин робита барои беҳтар ба роҳ мондани раванди таълиму тадрис дар заминаи муассисаи ибтидоӣ бунёди мактаби миёнаи умумӣ барои 480 ҷойи нишаст ба нақша гирифта шуд. Фармоишгари бинои нави  ин таълимгоҳ низ Вазорати маориф ва илми Ҷумҳурии Тоҷикистон буда, бунёди онро ширкати сохтмонии "Ниагара" ба уҳда гирифтааст.

Зимни боздид аз маҳалли сохтмон ва суҳбату мулоқот бо сохтмончиён Рустами Эмомалӣ таваҷҷуҳи бинокоронро ба баланд бардоштани сифату самараи корҳои бунёдӣ бо истифода аз масолеҳи хушсифат ҷалб кард. Иншооти мазкур тибқи лоиҳа то оғози соли таҳсили 2017-2018 сохта, ба истифода дода мешавад.

07.04.2017 дар шаҳри Душанбе боз як иншооти нав гузаргоҳи зеризаминӣ, воқеъ дар майдони "Сарҳадчиён"-и кӯчаи Гагарин мавриди баҳрабардорӣ қарор дода шуд.

Корҳои сохтмонӣ дар ин иншооти муҳими шаҳрдорӣ   22 ноябри соли 2015 оғоз гардида, 10 марти соли 2017 ба анҷом расонда шуд.Дар ҷараёни боздид аз ин иншооти ҷадид Раиси шаҳр ба масъулину сохтмончиён тавсия дод, ки зимни  бунёди чунин иншооти хизматрасонӣ дар асоси талаботи шаҳрсозӣ бояд ниёзмандиҳои тамоми қишрҳои ҷомеа, бахусус маъюбону барҷомондагон ба эътибор гирифта шавад.

Маврид ба зикр аст, ки гузаргоҳи зеризаминӣ бо дарназардошти талаботи шаҳрсозии муосир бунёд гардида, ба тамоми меъёру талаботи қоидаҳои роҳсозӣ ҷавобгӯ мебошад.   Сохтмони гузаргоҳ аз ҷониби Муассисаи давлатии "Раёсати сохтмон, азнавсозӣ ва таъмири роҳу кӯпрукҳои шаҳри Душанбе" анҷом дода шуда, арзиши умумии он 21 миллиону 450 ҳазор сомониро ташкил медиҳад.

Хурсандии сокинони кӯчаи Шамсии ноҳияи Синои шаҳри Душанбе ҳадду канор надошт. Бо ибтикори мақомоти иҷроияи ҳокимияти давлатии шаҳри Душанбе дар ҳамкорӣ бо Кумитаи давлатии идораи замин ва геодезии Ҷумҳурии Тоҷикистон барои  аҳолии маҳаллаи 82-и пойтахт Майдончаи варзишии бозии кӯдакон ва истироҳати калонсолон мавриди истифода қарор дода шуд. Лоиҳаи ин иншооти варзиширо, ки аз майдончаҳои волейбол, баскетбол, футбол ва дигар иншооти фаръиву ёрирасони истироҳативу варзишӣ иборат аст, мутахассисони Ҷамъияти саҳомми шакли пӯшидаи Иттиҳодияи илмӣ-истеҳсолии сохтмонии "Техноинвест" омода кардааст. Ин муҷтамеъи ҳозиразамон аз лиҳоз шаклу сохт ва унсурҳои хизматрасонӣ пурра ҷавобгӯи талаботи шаҳрсозиии муосир буда, дар он барои истироҳату фароғати сокинон тамоми шароитҳо муҳайё карда шудааст.

Раиси шаҳр зимни бозид аз ин комплекси варзишиву истироҳатӣ бо варзишгарону наврасони синну соли гуногун суҳбату мулоқотҳо анҷом дода, ба онҳо лавозимоти варзишӣ ва дигар тӯҳфаҳои хотиравӣ ҳадя кард. Рустами Эмомалӣ таваҷҷуҳи бунёдкорони иншооти мазкурро ба боз ҳам беҳтару хубтар  муҳайё кардани шароити арзанда барои сокинон равона сохт.

Дар баробари   майдончаву гулгаштҳо, ба сохтмони гӯшаҳои алоҳида барои бозии шоҳмоту шашка, истироҳати шахсони барҷомонда ва дигар иншооти зарурии комплекси манзилӣ таваҷҷуҳи хоса зоҳир гардиааст.

Барои боз ҳам ободу зебо гардонидани маҳалла дар ин мавзеъ беш аз 450 ниҳоли дарахтони сояафкану ороишӣ шинонда шуд.

Зимни суҳбату мулоқотҳои Рустами Эмомалӣ бо  ҷавонону пирони барнодил, сокинони  маҳалла аз сиёсати имрӯзаи давлату хукумати кишвар таҳти роҳбарии Пешвои миллат муҳтарам Эмомалӣ Раҳмон дар роҳи ободониву созандагӣ ва фароҳам овардани шароити лозима барои зиндагии шоиста сипоси бепоёни худро иброз доштанд.  

Корҳои ободониву созандгӣ дар Душанбе идома дошта, Мақомоти иҷроияи ҳокимияти давлатии шаҳр тасмим гирифтааст, ки дар асоси дастуру супоришҳои Сардори давлат дар тамоми  маҳаллаву шаҳракҳои пойтахт барои сокинону бошандагон боз 78 адад чунин иншооти ҳозиразамони варзишиву истироҳатиро  бунёд намояд.