ҚАРОРИ РАИСИ ШАҲРИ ДУШАНБЕ №177 АЗ 02.04.2025
Дар бораи баргузор намудани Ниммарафони XV байналмилалии Душанбе ба муносибати Рӯзи пойтахти Ҷумҳурии Тоҷикистон – шаҳри Душанбе
Бо мақсади дар сатҳи баланд таҷлил намудани Рӯзи пойтахти Ҷумҳурии Тоҷикистон – шаҳри Душанбе, мутобиқи моддаҳои 19, 20 Қонуни конститутсионии Ҷумҳурии Тоҷикистон «Дар бораи мақомоти маҳаллии ҳокимияти давлатӣ» ва моддаи 8 Қонуни Ҷумҳурии Тоҷикистон «Дар бораи тарбияи ҷисмонӣ ва варзиш»
Қ А Р О Р М Е К У Н А М:
1. Нақшаи чорабиниҳои Мақомоти иҷроияи ҳокимияти давлатии шаҳри Душанбе оид ба баргузории Ниммарафони XV байналмилалии Душанбе ба муносибати Рӯзи пойтахти Ҷумҳурии Тоҷикистон – шаҳри Душанбе, ҳайати Кумитаи тадорукот, низомнома ва харҷномаи он тасдиқ карда шаванд (замимаҳои 1, 2, 3 ва 4).
2. Сарраёсати Вазорати молияи Ҷумҳурии Тоҷикистон дар шаҳри Душанбе аз ҳисоби маблағҳои барои мақомоти пойтахт пешбинишуда ҷиҳати ташкили Ниммарафони XV байналмилалии Душанбе мутобиқи харҷномаи замимагардида 593040 (панҷсаду наваду се ҳозору чил) сомониро ба шуъбаи муҳосиботи дастгоҳи Раиси шаҳри Душанбе ҷудо намояд.
3. Кумитаи тадорукот дар ҳамкорӣ ва ҳамоҳангӣ бо муовини якум ва муовинони Раиси шаҳри Душанбе, роҳбари дастгоҳи Раиси шаҳри Душанбе, раиси ноҳияи И.Сомонии шаҳри Душанбе ва роҳбарони сохторҳои дахлдори Мақомоти иҷроияи ҳокимияти давлатии шаҳри Душанбе ҷиҳати дар сатҳи баланди ташкилӣ доир намудани чорабинии зикршуда тадбирҳои зарурӣ андешанд.
4. Шуъбаи иттилооти дастгоҳи Раиси шаҳри Душанбе, муассисаҳои давлатии «Телевизиони Душанбе» ва рӯзномаи «Паёми Душанбе» дар ҳамкорӣ бо Муассисаи давлатии «Телевизиони Варзиш» инъикоси васеи муҳтавои қарори мазкур ва рафти татбиқи чорабиниро тавассути воситаҳои ахбори омма таъмин намоянд.
5. Қарори мазкур барои тасдиқ ба Маҷлиси вакилони халқи шаҳри Душанбе пешниҳод карда шавад.
6. Назорати иҷрои қарори мазкур ба зиммаи муовини Раиси шаҳри Душанбе – сарпарасти соҳа гузошта шавад.
Рустами Эмомалӣ