ҶАМЪБАСТИ ОЗМУНИ ШАҲРИИ "ҲУНАРҲОИ ОРОИШӢ АЗ САНГ"

24 Январи 2020, Ҷумъа

ш.Душанбе. 24.01.2020. Имрӯз бо ташаббуси мақомоти иҷроияи ҳокимияти давлатии шаҳри Душанбе дар Муассисаи давлатии «Душанбе-Плаза» бо мақсади иҷрои банди 19 ҷадвали баргузории фестивал, намоиш, ид ва озмунҳои анъана ва ҳунарҳои мардумӣ дар Ҷумҳурии Тоҷикистон барои солҳои 2019-2021, ки бо Амри Президенти Ҷумҳурии Тоҷикистон аз 13 декабри соли 2018 тасдиқ гардидааст, озмуни шаҳрии «Ҳунарҳои ороишӣ аз санг» баргузор гардид, ки дар он ҳунармандони чирадаст аз ноҳияҳои шаҳри Душанбе маҳсули ҳунарҳои дастии худро ба намоиш гузоштанд.

Таъкид гардид, ки  мақсад аз баргузории озмун  эҳёю рушди ҳунарҳои мардумӣ, аз ҷумла сохтани маснуот ва коркарди сангҳои қиматбаҳою ороишии миллӣ, тарғибу ташвиқи фарҳанги  ин ҳунари қадимӣ, ба он ворид намудани  шаклу усулҳои муосир  ва тарбияи насли нави  ҳунармандони соҳа мебошад.

Ҳамзамон  ин озмун барои ҳавасмандгардонӣ, ихтироъкорӣ, тақвияти фаъолияти пешбурди навоварӣ дар соҳа ва баланд бардоштани қобилияти рақобатпазирии маснуоти аз сангҳои қиматбаҳою ороишии истеҳсолгардида равона гардидааст.

Кумитаи тадорукот аз намоиши омодакардашудаи ҳунармандони пойтахт дидан намуда, ба ҳар кадоми онҳо баҳои арзанда доданд.

Дар маросими ҷамъбасти  Озмуни шаҳрии «Ҳунарҳои ороишӣ  аз санг» намояндаи  ноҳияи Исмоили  Сомонӣ аз ҶДММ  «Рухом» Эраҷ Мунавваров бо гирифтани 276 хол  ба ҷойи якум мушарраф гардид. Намояндаи ноҳияи Фирдавсӣ аз ҶДММ   «Асрори санг»   Шарифи Далер  бо  гирифтани 269 хол  ҷойи дуюм ва ҳунарманд аз ноҳияи Фирдавсӣ  Покизамоҳ Руҳуллоева бо 253 хол  мақоми сеюмро ноил гардиданд.

Ҳамчунин ҳунармандон  аз ноҳияи Фирдавсӣ  Маҳмуд Бобоев  ва намояндаи   ноҳияи Исмоили  Сомонӣ аз ҶДММ  «Каром Гавҳар Нигор» Нурмуҳаммад   Собиров  барои иштироки фаъолонаашон дар озмун  бо сипосномаҳои мақомоти иҷроияи ҳокимияти давлатии шаҳри Душанбе сарфароз гардонида шуданд.

Дар фарҷоми чорабинӣ аз ҷониби мақомоти иҷроияи ҳокимияти давлатии шаҳри Душанбе ба иштирокчиён диплому тӯҳфаҳои хотиравӣ тақдим карда шуд.

Озмуни мазкур дар се давр доир гардида, пагоҳ - 25 январ дар корхонаи “Зари Тоҷик”-и шаҳри Душанбе даври ҷумҳуриявии он сурат мегирад.

 

Илова кунед