НАШРИ МАҚОЛАИ РАИСИ ШАҲРИ ДУШАНБЕ МУҲТАРАМ РУСТАМИ ЭМОМАЛӢ ДАР МАҶАЛЛАИ БОНУФУЗИ ФЕДЕРАТСИЯИ ҶАҲОНИИ ШАҲРҲОИ САЙЁҲӢ (WTCF) "WORLD TOURISM CITIES"

27 Июли 2021, Сешанбе

 
ш.Душанбе. 27.07.2021. Бо ибтикори Сафорати Тоҷикистон дар Чин ахиран маҷаллаи маъруфи “World Tourism Cities”-и Федератсияи ҷаҳонии шаҳрҳои сайёҳӣ (WTCF) қисмати асосии шумораи навбатии худро ба Ҷумҳурии Тоҷикистон ва пойтахти зебои он - шаҳри Душанбе бахшид.
Маҷалаи “World Tourism Cities” дар ҳошияи се ҷанбаи асосӣ: 30-солагии Истиқлолияти давлатии Ҷумҳурии Тоҷикистон; кишвари дорои имкониятҳои фарогир дар соҳаи сайёҳӣ будани Ватани мо ва давраи Раёсати Ҷумҳурии Тоҷикистон дар Созмони ҳамкории Шанхай, ки ба 20-солагии таъсисёбии Созмон рост меояд, роҷеъ ба кишвари мо маводҳои хонданбоб бо забонҳои чинӣ ва англисӣ ба табъ расонд.
Маҷалла бо мақолаи Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ оғоз ёфта, дар он сухан дар бораи дастовардҳои беназири пойтахт дар ҷодаи ободонӣ, рушди робитаҳои судманди ҳамкорӣ ва бародаршаҳрӣ бо шаҳрҳои дигари ҷаҳон, аз ҷумла узвияти шаҳри Душанбе дар Федератсияи ҷаҳонии шаҳрҳои сайёҳӣ (WTCF) меравад.
Дар маҷалла ҳамчунин, мақолаи Раиси Кумитаи рушди сайёҳии назди Ҳукумати Ҷумҳурии Тоҷикистон муҳтарам Тоҷиддин Ҷӯразода оид ба муаррифии имкониятҳои сайёҳии кишварамон бо аксу мусаввараҳои табиати нодири диёр ва бозгӯяндаи дастовардҳои шаҳрдорӣ оид ба ободу зебо намудани пойтахти Ватанамон - шаҳри Душанбе нашр шудааст.
Дар мусоҳиба бо маҷалла Муовини Сафири Тоҷикистон дар Чин, Намояндаи доимии Ҷумҳурии Тоҷикистон дар назди Котиботи Созмони ҳамкории Шанхай Муҳаммад Эгамзод роҷеъ ба омодагии шаҳри Душанбе ба истиқбол, пазироӣ ва баргузор намудани Саммити ҷашнии сарони давлатҳои аъзои СҲШ, ки қарор аст 16-17 сентябри соли равон дар пойтахти Тоҷикистон доир гардад, изҳори назар намудааст.
Бояд гуфт, ки маҷаллаи маъруфи “World Tourism Cities” бо забонҳои чинӣ ва англисӣ нашр шуда, дар зиёда аз 130 шаҳри сайёҳии 75 кишвари ҷаҳон паҳн мегардад.
Ин шумораи маҷаллаи “World Tourism Cities” ба истиқболи 30-солагии Истиқлолияти давлатии Ҷумҳурии Тоҷикистон туҳфаи арзандае мебошад.
 
 
 
 
 
 
 
 
 

Илова кунед